Ratschläg: Nüt ferplämpere!
Bisch tuch, aber gsund?
Mach immer nur das, wo du kei Luscht druf hesch.
Schtiig us de Traufe, im Räge ischs frischer
de Beelzebueb chasch mit em Tüfel sinere Grossmuetter ustriibe
und wenn si säged «Ändi guet», so cha mer sich de Räscht dänke!
Triangel
D Chind vo eusne Fründ
Finnegan, Pamina und Solveig
heissed d Chind vo eusne Fründ
Künschtler sind ihri Götti gsi
und doch schtönd sie da mit ihrne runde Brüllegläser
– alles Chinder vo Wiitsichtige –
mit ihrne kahlgschorne Chöpf
(wäge Lüüs im Chindergarte)
händ schwarzi Metallplättli uf de Zäh
wie wenn sie rüefe wetted:
Chömed i drü Jahr wider, wenn d Druckfahne bereinigt sind
mir sind erscht de Arbeitstitel
mer sind no i Korrektur …
Min Schutzängel (wichtig für Corona-Ziite)
(mit Dank an H. M. Enzensberger für de Schnäll-Umdreih-Tipp)
Geschter han ich mich blitzschnäll umdreiht
Do isch min Schutzängel hinder mir gschtande
Chli und vertschudled, s Röckli blau tupfd
(Rasse: gemeine Huusängel i de Wärchtigstracht)
Das isch erscht zweite Mal gsi, dass ich öpper us em Jensiits gseh ha.
Wonneklöss
Di eine sind Wonneklöss – falled immer uf d Füess.
Den andere isch’s wärmscht Mänteli z’gross
Di eine sind chäch und zäch
Die andere di chline fine
Und was isch mit dene zwüschedrin?